Ukrayina Yuqarı Radası çoqlu vatandaşlıq institutını kirsetmege közde tutqan qanunnı bütünley qabul etti – bu aqta iyünniñ 18-nde halq deputatları bildirdiler.
Vesiqağa 243 parlament azası rey berdi.
Qanun leyhası memleketniñ prezidenti Volodımır Zelenskıynıñ teşebbüsi ola.
«Halq hızmetçisi» («Sluğa narodu») firqasınıñ yolbaşçısı Olena Şulâk qayd etti ki, qanun deñişmeleri «büyük cenk vaqtında ve ondan evel, Vatanından ketmege mecbur olğan millionlarnen ukrayinalılarnıñ bağlarını saqlap qalmağa, tış memleketlerden yatırımlar celp etmege ve Ukrayinanı Avropa standartlarına uydurmağa» yardım etecek.
Vesiqa Ukrayina vatandaşlarına çoqlu vatandaşlıq almağa imkân bergen vaziyetlerni belgilemekte:
- balanıñ doğğanda Ukrayina vatandaşlığını ve başqa devletniñ vatandaşlığını (tebaalığını) aynı vaqıtta ala
- Ukrayina vatandaşı olğan balanıñ onı evlâtlıqqa alğan ana-babasınıñ vatandaşlığını ya da tebaalığını ala
- Ukrayina vatandaşınıñ başqa devlet vatandaşınen evlenip, o memleketniñ vatandaşı ola
- çağına yetken Ukrayina vatandaşına nisbeten çetel devletiniñ vatandaşlıq qanunları qullanılğan olsa, Ukrayina vatandaşı diger devletniñ vatandaşlığı (tebaalığı) olğanını tasdıqlağan vesiqanı almağan olsa, başqa vatandaşlıqnı ala
- Qanun belgilegen qolaylaştırılğan nizamda çetel vatandaşı Ukrayina vatandaşlığını ala
- Ukrayina vatandaşı vatandaşları qolaylaştırılğan nizamda Ukrayina vatandaşlığını alıp olğan devletler cedvelinden memleketlerniñ vatandaşlığını ala bile.
Yuqarı Rada istilâcı ya da işğalci dep tanılğan devletniñ ya da Ukrayina topraq bütünligi ve suverenitetini tanımağan memleketniñ vatandaşlığı olğan şahıslarğa çoqlu vatandaşlıq aqqını bermey.
Keçken seneniñ soñunda Yuqarı Rada çoqlu vatandaşlıq qanun leyhasını birinci oquvda qabul etti. Temel olaraq qabul etilgen №11469 qanun leyhasını Ukrayina prezidenti Volodımır Zelenskıy 2024 senesi avgust ayında parlamentke berdi.
Vesiqada Ukrayina vatandaşlarınıñ çeşit memleketlerden bir qaç pasportı olmasına berilgen izin ve çoqlu vatandaşlıqnıñ şartları belgilene.
Böylece, çetel vatandaşlığını alğanlar Ukrayina vatandaşlığını da saqlay bile. Qanunğa köre, çetel vatandaşlarınıñ Ukrayina pasportı aqqı bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
